Yohan Te Taafer sayn mensajeere
1Wii Yeesus kraat fërtich waar mit tëne ortnunge se kewe fer sayn tswelef tisiple, is er fon tëm plats fort kang un is unterichte kang un sayn preeticht mache in te xtet woo too ticht rom waare.
2Yohan, Te Taafer, waar in te katee un, wii er keheyert hot se xpreche iwich was Kristus am mache waar, hot er phaar fon sayn tisiple kexikt 3tas se solte iim frooe keen:
— Pist tuu tee woo khome solt ore sole meyer en anere waarte?
4Yeesus hot keantwort:
— Keet tsurik un fertseelt fer Yohan was teyer am heere un am siin sayt. 5Saat tëm tas ti plinte siin, ti laame keen, ti lepra kranke sin keheelt, ti taupe heere, ti toote kewe peleept, un ti aarme heere te ewankeelium. 6Un kliklich sin tii woo net sayne klaawe an mich neewe lose!
7Wii Yohan sayn tisiple fort kang sin, hot Yeesus aan kefang iwich Yohan se xpreche un saat fer tas folek:
— Was sayt teyer in te tesërt kuke kang? En roer xtang woo mit yeete wint xitelt? 8Was sonst sayt teyer kuke kang? En man woo fayn keklayt waar? Ti fayne layt woone in palase! 9Tan saat mich: was hot teyer kewaart se siin? En profët? Yoo. Un ich fersichere tas teyer fiil mee wii en profët kesiin hot. 10Wayl Yohan is tee iwich weem ti Hayliche Xrifte saan:
“Hier is mayne mensajeyer, saat Hërkot.
Ich tuun tee foer tich xike fer te weech prepareere.”
11— Ich fersichere aych tas tas woer is: fon te kanse mënxe woo xon uf tee welt kepoer kep sin, is Yohan te kreeste. Awer weyer te kleenste im Himels Raych is, is kreeser wii tee. 12Tsayt ti taache woo Yohan sayn preeticht aan kep hot pis hayt tsu taach, is te Himels Raych mit kewalt pekhëmft kep, un kewaltiche mënxe fersuuche em kewine mit kraft. 13Pis an Yohan sayn tsayte, hon ti kanse Profëte un Mooses Kesets kexproch iwich te Raych. 14Un wen teyer klaawe wolt an tëne sayn mensaaj, Yohan is Eliias, woo het sole khome. 15Weyer oore hot sol kuut heere.
16— Awer, mit weem khan ich ti layt fon hayt tsu taach ferklayche? Sin wii khiner woo uf te prase huke. Eene krupe xraayt fer te anere:
17“Meyer hon hochtsayts music kexpiilt, awer teyer het net ketanst!
Meyer hon peërtichungs liiter kesung, awer teyer het net keprilt!”
18— Yohan, Te Taafer, halt faxte un trinkt khee wayn, un al saan: “Tee is tomineyert fon en temoon.” 19Te Soon fom Man est un trinkt, un al saan: “Kukt! Tee man is en freser un en sifer! Is froynt fon te xtayer kaseerer un anere layt mit xlechte name.” Awer, is torich sayn resultaate woo em Hërkot sayn wisheet tsaycht tas se echt is.
Ti xtet woo net keklaapt hon
20Tan, hot Yeesus aankefang ti xtet aan saan woo eyer ti wunere kemach hat. Eyer hat tas kemach wayl tii inwooner hon sich net keroyert fon sayn sinte. Yeesus saat:
21— Ay fon tich, xtat Korasim! Ay fon tich, xtat Petsayta! Wayl, wën ti wunere woo pay aych kemach kep sin in te xtet Tiro un Sitoom kemach kep weere, hete tëne sayn inwooner xon lang sayn sinte tsurik kelos. Un, fer se tsayche tas se sich keroyert hete, hete se sich mit krop tsaych aan ketsoo un hete ex uf te khop ketuun! 22Also, ich fersichere aych tas, am Kerichts Taach, tuut Hërkot Tiro un Sitoom mee petaure wii aych, Korasim un Petsayta. 23Un tuu, xtat Kafarnaum, tënkst test ruuf khome pis an te himel? Nee! Tuu kepst in ti toote welt kexmis! Wayl, wën ti wunere woo too kemach kep sin in te xtat Sotoma kemach kep weere, teet tii pis hayt eksisteere. 24Wayl ich fersichere aych tas, am Kerichts Taach, Hërkot Sotoma mee petaure tuut als tich, Kafarnaum!
Yeesus tuut uns inlaate
25In tëm momënt, saat Yeesus:
— Oh, Fater, Hër fom himel un fon te eyert, ich tanke tich wayls tuu fer ti layt oone xtuutium ketsaychst host was tuu ferxtekelt host fon te kelernte un fon tëne woo wisheet hon. 26Yoo, Fater, tas soo mache hot tich frayt kep.
27— Mayne Fater hot tas mich ales kep. Nimant wees weyer te Soon is, sonst te Fater; un nimant wees weyer te Fater is sonst te Soon un aach tii tsu weem te Soon tsayche wil weyer te Fater is.
28— Khomt tsu mich, al teyer woo miit sayt weche ayre xweere last traan, un ich wil aych ruu kewe. 29Sayt mayn aanhënger un lërnt mit mich wayl ich sin kuut un hon en waaych hërts; un teyer fint plats fer se ruue. 30Ti flichte woo ich fon aych ferlange sin laycht, un te last woo ich aych uf tuun is net xweyer.
