Provérbios 11

₁Jokorea rupi mba'emo opeja va'e gui Senhor ojeguaru,

ha'e rã ha'evea'i rami opeja va'e ma oguerovy'a 'rã.

₂Jajejou porã rei rive ramo avave rei nanhanemboeteai 'rã,

teĩ nhanhemo'yvyĩ'i vy ma jajou 'rã nhane'arandurã.

₃Heko porã va'e anhetẽ rupi ikuaia ma oguereko 'rã ha'evea rupi,

ha'e rã anhetẽ rupi e'ỹ ikuai va'e ma anhetẽ e'ỹa ae 'rã omomba.

₄Nhombopagaa ára py opa mba'e jarekopa va'ekue ndovarei 'rã mba'everã,

ha'e rã nhandereko porãa ma nhandereraa jepe 'rã manoa gui.

₅Anhetẽ rupi ipy'a va'e pe ma heko porãa ae omoatyrõ 'rã haperã,

ha'e rã heko vai va'e ma ho'apa 'rã ha'e kuery ae reko vaia py.

₆Heko porã va'e oo jepe 'rã ha'e kuery ae reko porãa py,

ha'e rã jokorea rupi ikuai va'e ma ha'e kuery ae reko vaia py 'rã ombo'aa.

₇Heko vai va'e omano ramo mba'emo oarõague voi opa 'rã,

heko vai va'e oarõague opa rive 'rãe.

₈Heko porã va'e ogueraa jepea 'rã ojexavaia gui,

ha'e gui heko vai va'e re jevy 'rã ha'e nunga ou.

₉Anhetẽ rupi e'ỹ ikuai va'e ma ayvu py rive oity 'rã oirũ kuery,

ha'e rã heko porã va'e ma mba'emo oikuaa rupi oo jepe 'rã.

₁₀Heko porã va'e ikuai porã ramo tetã pygua kuery ha'e javi 'rã ovy'a okuapy,

ovy'a avi 'rã okuapy heko vai va'e okanhy ramo.

₁₁Heko porã va'e ogueroayvu porãa rupi tetã ha'e javi rupi 'rã ikuai porã,

ha'e rã heko vai va'e kuery ijayvua rupi ma oitya 'rã.

₁₂Oirũ pe “Mba'e vare'ỹ” he'i va'e re ma noĩ 'arandua,

ha'e rã ava hi'arandu va'e ma okyrirĩ 'rã oikovy.

₁₃Joekokue ramigua rive omombe'u va'e onhea'ã 'rã onhomi mbyre oikuaa aguã,

ha'e rã ojeroviapy ma onhomi mbyre nomboaxai 'rã.

₁₄Joguerekoa hi'arandu va'e ndoikoi ramo avakue pavẽ 'rã ho'apa,

teĩ nhomongetaa heta ikuai ramo ma ikuai porã 'rã.

₁₅Oirũ orevea opaga aguã rami oiko va'e ojexavai 'rã,

ha'e rã ha'e rami ndoikoi va'e ma oĩ atã 'rã.

₁₆Kunha porayvu va'e ojou 'rã imboetearã,

ipo'akakueve ojou-joupavea rami avi.

₁₇Mborayvu rupi ikuai va'e ma ha'e kuery pe ae ojapo porã,

ha'e rã joapo vai rei va'e ma ha'e kuery ae onhemoĩ vai uka.

₁₈Heko vai va'e ojeupe guarã ojou va'e ma imarã va'erã,

ha'e rã teko porã rupi oiko va'e ma anhetẽ ete va'e guigua ojou 'rã oikoague repy.

₁₉Heko porã va'e oo 'rãe tekove katy,

ha'e rã teko vai rupi ikuai va'e ma omano ete 'rãe.

₂₀Opy'a py opa marã ikuai va'e gui Senhor ojeguaru ete 'rã,

ha'e rã anhetẽ rupi ikuai va'e ma oguerovy'a 'rã.

₂₁Heko vai va'e nombopagaa e'ỹi 'rã, jaikuaa,

ha'e rã heko porã va'e kuery regua ma oo jepe 'rã.

₂₂Ouro guigua ma poryko xĩ jeguarã oĩ ramo nda'evei.

Ha'e rami ae kunha porã re hi'arandu e'ỹa oĩ ramo nda'evei.

₂₃Heko porã va'e oipotaa rami vy oiko 'rã nhomoingo porãarã,

ha'e rã heko vai va'e ma mba'emo oarõ va'ekue 'rãgue py oiko 'rã imbopagaarã.

₂₄Joupe mba'emo ome'ẽ rive-rive'i va'e ojou retave 'rã heravy,

ha'e rã nome'ẽ rivexei va'e ma oipotapa rei 'rã.

₂₅Imba'eme'ẽ porã kuaa va'e ma oiko porã 'rã,

joupe oy'u va'erã ome'ẽ va'ekue ju omboy'ua 'rãe.

₂₆Mba'emo aju nomboja'oxei va'e re ma heta va'e kuery ijayvu vai 'rã okuapy,

ha'e rã ivendeare ma ogueroayvu porãa 'rã.

₂₇Joupe ojapo porãa rupi ikuai va'e omboetea 'rã,

ha'e rã teko vai rupi rive ikuai va'e ma ha'e kuery re ae ju 'rã ojeapa heko vaiague.

₂₈Omba'e rei-rei re rive ojerovia va'e ho'a 'rã,

ha'e rã heko porã va'e ma ijaguyje 'rã mba'emo rogue ipyaupaa rami.

₂₉Ngopygua kuery ndoguereko kuaai va'e ojou 'rã yvytu rive,

ha'e hi'arandu e'ỹ va'e ikuai 'rã hi'arandu va'e rembiguairã.

₃₀Heko porã va'e ma yvyra'a tekove me'ẽa rami ikuai,

tekoverã joua ma hi'arandu va'e ae vy ma 'rã.

₃₁Yvy re heko porã va'e ikuai teria ja ombopagaa 'rã.

Heko vai ha'e ojejavypa rei va'e kuery katuve ma ombopagaa 'rã.