Mateo 27

₁Ssiuarrezape dada toqquimade taminedeni, ime rrocouideni tezerre queriqquimanaza pouadenira uimahaha canarrari. Rrehe canirezapa Zeso zoqqueuiuarrine uima narroremanarrari. ₂Nazapa Zeso birri rrore iquenaza tamine Piratouarri iaqquemanarrari, —Zeso zoqquena −quenauiuarrine. Tamine Piratopa rromanodeni. Pouapa zodeodenicca zama cacauade torrarrari.

₃Zeso ccaccorade Zodapa —Zeso zoqqueuiuarrine iaqquemanarrari −quenaui uima mittazapa poua bodi uarro narrari: —Rraho nerrecotoui Zeso ouaccorarraritta? −narrari. Nazapa dada toqquimade taminedeni, ime rrocouideni, narrarideni bazima ziniro ccarara 30 nehe Zoda pouaza da iquenaporraro pouadeniza da inaniniuarrine pouadeniuarri toqquezimanirrari. ₄Pouadeniza uati tarrari: —Rraho, uaidirehe onanarraro. Zesopa uimasiri cappiraraha orrine tizepedeniza torrazapa zoqqueuitoui −naui nade Zoda. Naraha pouadenipa: —Peperriua, irrine rrerani. Ticca uimasiripe ticca −quenaui nade. ₅Nazapa poccadeni danirri ccarara 30 nehe Deoza dada toqquima bodiuarri quissa inanirraro. Quissa inanihe rriquezape toccanirrari. Zotodepa pouarrine poua matto ssoque taza tocarroppaza zoqquerrari.

₆Nazapa dada toqquimade taminedenipa narraro ziniro ccarara inaccanimaneza attidenipa: —Arrirraro ziniro madirra zoqqueuiuarrine paca quenarrariccape Deoza dada toqquimauarricca ziniroza carrimananiuarrine oppina tani. Narraro zinirope madirra emene toccauiuarrine manaconi −quenaui nade. ₇Nazapa uimahaha canaha rricazapa narraro ziniroza zama onini: Zipa nanauatodecca quequenanauiuarri mitta iquenarraro, —Narraro zamape matacossauideni noccobirideni torraniuarrine −quenaza. ₈Naraha narraro zamape Zodaza da iquenaporrarocca ziniroza mitta iqueneza narraro zama onini canacanizatipe: —Touemene manaconiza mitta nanicca zama −quequenanarrari. Arri oua omadiza arrirraro dozode orreza naqui madirrapa nama quequenanauiparra naccaui. ₉Narraro zama zodeodenicca taminedeni mitta iquenarrarope pina maittaccazama Deo Atti cacomerabote Zeremia dozo inaporrarossa narraro. Narraro uimape arrima narraro:

₁₁Tamine Piratouarri Zeso iaqquemanaza naui Pirato baccouarri inauemanarrari. Nazapa Pirato Zesocca uima mittauiuarrine pouaza uati tarrari: —Tiape zodeodenicca tamine tirraqui? −narrari. —Rrehe, tetti nema tarraroparri −narrari Zeso. ₁₂Naraha dada toqquimade taminedeni, ime rrocouideni tezerre Piratoza poccadeni maizehe uati toquenarrari. Naraha Zesopa zamarrama narrari. ₁₃Nazapa Pirato Zesoza uati tarrari: —Ticca uima bica terrerani quenarrari uima uapi tani uati uati toquenaraha timitte-rrerarraroqui? −narrari. ₁₄Naraha Zesopa uati tarrararrari. —Occa uima ouacomerana −narrararrari. Pouaza uima inassonarimanarraroza naqui: —Parrissa rrerani −narrararrari. Noueraui. Nama nazapa tamine Piratopa uarro narrari. Poua bodipa: —Nerrecotoui poua cacomarrari? −narrari.

₁₅Uarrano uarrirriraza zodeodenicca errete Pascoa torreza tamine Piratopa toponi cocoroza madirra uezemanarrari orraria pouarrine qqueqquenemana narrari. Madirra bazima toui quenarrarina pouarrine qquenauiuarrine narrorarrari. ₁₆Nazapa toponi cocoroza uezarrari orraria onipa Barraba. Pocca uima uaidira teza madirra bazima pouaza nauatoqquiri narrari. ₁₇Nazapa Pirato pouauarri madirra queriqquirronaza pouadeniza uati tarrari: —Nerrecorrarina qquenauiuarrine toui tiquenarraro? Barraba qquenauiuarrineco? Zesoza “Cristo-Mesia” quequenanarrari tappa onauiuarrinerana? −nade.

₁₈Piratopa poua bodiza Zesopa uima cappiraui nauato taporrari. Poua bodipa: —Dada toqquimade taminedenipa Zesocca deni torrehe acconi uadimanaza ouaza eccarronemanarrari −narrari. ₁₉Piratopa uima cacattemauarricca uiuittariza uittariccaza pocca amonerre pouaza uima zosse inarronarraro. Poni attinipe: —Narrari maqquiderrepa bica tarrari. Pouaza uima tinana-rrerana. Zomeza Zesocca uimarrine occa uada oppina tapa −narraro.

₂₀Naraha dada toqquimade taminedeni, ime rrocouideni tezerrepa Zesoza uima inanemananiuarrine narroremanarrari. Madirra bazimaza uati narizemanarrari: —“Barrabana qquenana” tiquenarri. “Zesopa zoqquena” tiquenarri −narizemanaui quenade.

₂₁Nazapa tamine Pirato arra bazima domo uarrarideniza uati tapomarrari: —Arra pamaha tozepe toquerrenarraripa nerrecorrarina orrine qquenauiuarrine toui tiquenarraro? −napomade. Nazapa bazima rrouaua rrouaua canarrari: —Barrabana tirrine qquenarro, qquenarro! −quenade.

₂₂Naraha Piratopa domo uarrarideniza uati tapomarrari: —Rrehe, naraha Zesoza “Cristo-Mesia” quequenanarraripa nerrecoma onanauiuarrine touini tiquenani? −nade Pirato atti. Naraha bazima rrouaua rrouaua canapomarrari: —Narrari Zesona aua porimacossaniza zoqquena, zoqquena! −quenade. ₂₃—Naraha nerrecotoui zoqqueuiuarrine? Nerreco uimara inanarraro? −nade Pirato atti. Naraha domo uarrarideni bazima parra rroua toquenariui naza: —Aua porimacossaniza zoqquena, zoqquena! −quenade.

₂₄Naraha Pirato poua bodi uatorrari: —Ouatti parrire-rrerani. Pouadenirrine mouanirri oppina tehe torrabote nani −nade. Nazapa Pirato poua zepe ssaua nauiuarrine passotoui uaua narrari. (Poua zepe ssaua narraricca uimape: —Ouape uima ocappirani −narrarissa narraro.) Nazapa passo zorro icanarronemaneza bazima qqui toquenaza Pirato poua zepe ssauade torrazapa uati tarrari: —Arrarrari madirra zoqqueuiuarrinepe occa uima rrerani. Poua emene toccauiuarrine rrehe onerrerarraro. Narrarope ticcadeni uima −nade Pirato. ₂₅Nazapa madirra bazima attidenipa: —Rrehe, peperri! Ettirrine zoqqueza poua emene toccarraro manaconipe iaza, icca erredeniza torrani bica tani −quenade.

₂₆Naza tamine Piratopa Barraba qquenauiuarrine uati tarrari. Nazapa pocca isso teppeppedeni Zeso cossi inaqquimanauiuarrine icazossebaqquirrari. Cossi inaqquimanaha rricazapa icazossebaqquipomarrari: —Aua porimacossaniza coba tizanemanauiuarrine tiaqquemanarro −nade Pirato.

₂₇Nazapa tamine Piratocca isso teppeppedenipa oza imeni bodiuarricca boroniza Zeso iaqquezimemanarrari. Nauiza rromanodenicca isso teppeppe bazima toqueriqquirrari. ₂₈Pouadenipa: —Zeso pina taminessa inanana −quenaraha maizemanarrari. Nazapa Zesocca etero ssiti iquenaza etero macconi motaranicca pina taminedeniccassa narraroza Zeso oro izimemanarrari. ₂₉—Zeso taticca pina tamine tatideniccassa nana −quenaraha cotiui atinema rrore nauarraniuira ettarimanarrari. Poua zepe nauatoniuarriccaza naco pina taminecca zozopissa nehe aua ppaua tarrarora da iquenarraro. Nazapa rrarra icanaqquimanauiuarrine poua baccouarri pouadeni pitoza rrassi tazapa: —Deni tirrani zodeodenicca tamine! −quenaraha maizemanarrari. ₃₀Nazapa ppito inaqquimanarrari. Poua zepecca aua idinimaneza narraroza poua tatiza uacca uacca quenarrari. ₃₁Nazapa maizeheza pouaza rriza rriza quenaha rricazapa etero macconi motaraniccape ssiti iquenaza poua pocca eterora inauezanimanarrari. Nazapa aua porimacossaniza Zeso coba izanemanauiuarrine iaqquemanarrari.

₃₂Isso teppeppedenipa Zeso iaqquemananarra zama Sirenecca madirra Simao bacco irrizemanarrari. Zesopa aua porimacossani zorro ineraha rrao torraza isso teppeppedenipa Simao icazossemanarrari: —Manaco tia arrarraricca aua porimacossani zorro tinarri −quenazapa manaco Simaona zorro inarraro. ₃₃Nazapa ssono Cocotauarri rraui torremora, bacco tomoremanarrari. (Ssono onini Cocota ettizape: Totati Tonanissa nani, quequenanarrari.) ₃₄Nauiza uva pperrene bidaboteza carrimaui Zesoza da icanemanarrari, —Poua comene orrizema naniuarrine −quenaza. Naraha bazira taha icatama, —Poua −nade.

₃₅Nazapa aua porimacossaniza coba izanemanarraride. Coba izanemanaha rricazapa acca icanamacosse-manarrari. Nazapa Zesocca eterotoui isso teppeppedeni siba bedeniza coro coro quenarraride, —Pocca etero nerrecorrarizana torraniuarrine? −quenaza. Narraro sibaza ittomemanazapa pocca etero pouadeniza orrari orrari narizarrarode. ₃₆Ittomemanaha rricazapa nauiza cacauade rrassi tarraride. ₃₇Zeso tati tetepiuarri naqui dozo nani coba izanemanarraro. Narraro dozo nanipe: —Arrarraripa Zeso, Zodeodenicca Tamine −narraro. ₃₈Bobotide pamaha naco Zesozama topamarronauiuarrine aua porimacossaniza cobaba izanemanade. Ouahapa Zeso uinori nauatoniuarri que, ouahapa Zeso uinori ssamouarri que tade.

₃₉Madirra naui rraui torreqquimarrarideni Zesoza nacasseraqquiri naza tatamasso quenarrari. Tatideni uide uide quenaza attidenipa: ₄₀—Arrina, tettipe: “Deoza dada toqquima ocatabozape uada 3 neza ocanauatoninitoui” taterre nade −quenade. —Rrari, parrissa Deo Bedi tirrezape tia tinassiuauarri. Aua porimacossaniza tia tidiniza ticcaronarri −quenade. ₄₁Nazapa dada toqquimade taminedeni, zodeodenicca marinarra maridedeni, ime rrocouideni tezerre Zeso itamassomanarrari. ₄₂Attidenipa: —Arrana, madirra ouaha inassiuauabaqquiraha poua tonassiuauadepa ssamo taui. Pouapa Izarraeo potemauidenicca tamine torrazapa aua porimacossaniza ccaronana. Nazana pouaza parrissa inaniuarrine −quenade. ₄₃—Arrana pouapa Deoza rrehe nauissa tarrari. Deopa parrissa pouaza uati uana tazapa rridapanana poua inassiuauana, inarraro. Arrana, poua attipa: “Ouape Deo Bedi orrani” nanarra nade −quenade, rriza rriza quenaza. ₄₄Bobotidedeni naco poua uinoriza aua porimacossaniza cobaba zanaraha narraro touattissa narraroza Zesoza atti atti quenade.

₄₅Marri orrari uaririnaza zama nemanehe tozizini narraro. Zizi zanaporrarope marri 3 bacco tarraro. ₄₆Narrari marri 3ʼza Zesopa poua attiza rrazirema uaua narrari: —Eri, Eri rema sabatani? −naui nade. (Narrarope: —Abi Deo, Abi Deo nerrecotoui oua tineborraro? −narrari nade.) ₄₇Naraha nauiza domodeni uarrari mittemanazapa: —A, maittaccazamacca Deo Atti cacomerabote Eriaza uaua naui −quenaui nade. ₄₈Nazapa nauiza domo uarrari orraria uassinarra rroppa tarrari, uassa tarrari idi, uva pperrene ssicata bida tarrariza ezippa, pparra torraza aua arabo tarraroza oro, da icanamacossarrari. ₄₉Naraha madirra attidenia: —Maqui, niza pazerre! Poua inassiuauauiuarrine Eria ccarronauitiderra. Qqui inaccana −quenaui nade.

₅₀Naraha Zeso rrazirema rroua napomazapa uatiarrari. ₅₁Nanerre Deoza dada toqquima bodiuarricca uauacossa etero sibabote naqui Deorrine sseo naronarraro. Carobe narraro. Nami naqui zaroro narraro. Siba imeni uiuitteri narizarraro naqui caroberizarraro. ₅₂Tonoccobiri mota naqui touabarizarraro. Deoza parrissa quenaporrari rricaporrarideni uapi taha Deorrine nauatonimanaui nade. ₅₃Nauatonimanazapa pouadeni noccobiriza rrauininerizarrari. Naraha zotode Zeso nauatonizana narraridenipa oza panani Zerozareuarri rraui torrezimanirrari. Nauiza madirra bazima pouadeni qqui inabaqquimanarrari.

₅₄Nazapa ssonouarri isso teppeppe tamine, pocca isso teppeppedeni tezerre Zeso cacauade domo uarraridenipa nami zaroro nani qqui, oppina tanicca uapima qqui toquenazapa uarro quenaza attideni: —Rraho! Parrissa arrarraripa Deo Bediraha −quenaui nade.

₅₅Amonerredeni naqui uarri taniza cattade domoni uarraro. Ponidenipe Zeso zama arobeni Carireaza ccarizapoza poua accode pouaza rrauirizarraro. ₅₆Ponidenipe uapi teraha mota oninidenina Maria Madarenauarricca, Zoze Tiacodenicca ami Maria, Zebedeo bedidenicca ami quenarraro.

₅₇Zomebote naza zepe ssebote oni Zozepa tamine Piratoza uatide toccarrari. Pouapa oza panani Arimateauarricca madirra. Pouapa taide Zesocca torraporrari. ₅₈Nazapa tamine Piratoza bacco taza Zeso assire ppa izauiuarrine uati tarrari nade. Nazapa Pirato pocca isso teppeppedeniza uati tarrari: —Arrarrari madirraza Zeso assire da tiquenana, ppa izauiuarrine −naui nade. ₅₉Nazapa naui Zeso coba zanaha que tauiuarri bacco toquenaza Zozeza Zeso assire da iquenazapa etero zorrorani onini linho bica tarraroza rrore inaqquizapa zorro inarrari. ₆₀Nazapa tonoccobiriuarri zorro inarrari. Narraro tonoccobiripe Zoze zama mitta inapoza poua noccobiri torraniuarrine taide sibaza ui quenaporraro. Narraroza Zeso assire ibezarrari. Zoze qquenazapa siba imeni ecossanirraro, Zeso noccobiriza uacossaniuarrine. Nazapa Zoze toccanirrari. ₆₁Naraha Maria Madarenauarricca, Maria onihi tazarranipe ibomaneza Zeso noccobiricca siba uacossaniuarri tocattanimaneza zitocanarraro.

₆₂Nezape uada ssiuarra, rrassinarracca uadaza dada toqquimade taminedeni, marinarra parizeoza rrehe quenarrarideni tezerre tamine Piratoza uatide rraui torrapomarrari. ₆₃Bacco toquenazapa attidenia: —Ia zossede, ibodi uatomarraro, arra maitta maizarriderabotepa zoqque-rraraccazama poua attipa: “Niza ozoqquezape uada 3 neza onauatoninitoui” nanarra nade. ₆₄Nama nazapa poua noccobiri ecauemananiuarrine ticca isso teppeppedeni zosse tinabaqquirro, zepedeni panauissa taza uada 3 nehe ecauemananiuarrine. Nama quenazapa pocca zozosse tabaqqui zome Zeso assire idinemana-rrarauiuarrine. Idinemanazapa madirra bazimaza maizemanaza: “Zeso nauatoniui” quenarana. Zeso poua madiza naco maiza maiza naporrari. Pocca zozosse tabaqqui madirra bazimaza: “Zeso nauatoniui” quenazapa maizanirrirideni denima uaidira terana −quenaui nade. ₆₅Nazapa Pirato pouadeniza: —Rrehe, Zeso noccobiri cacauade isso teppeppe rraui torrauiuarrine zossede nacassa onani. Tiaccabaqquimanarro, poua noccobiri moua quena-rrarauiuarrine isso teppeppedeni zepedeni panauiuarrine −naui nade. ₆₆Nazapa taminedeni isso teppeppedeni tezerre rraui torrazapa siba imenibote uittacossanicca rrore nani zepedeni panauissa tazapa: —Peperriua. Dicca naniuarrine ssamo tani −quenaui nade. Nazama rrore nani ideniza moza nepi quenaza narraro nepi neza niqui tozanarraro. (Narrarope dicca naza bararini auato taniuarrine.) Nazapa taminedeni isso teppeppedeni inebobaqquimanazapa rraui torranirrari.