Markus 8

₁En tsayt tëm noo, hot sich noch mool en kroos folek kesamelt. Wayl se niks hate fer se ese, hot Yeesus ti tisple keruuf un saat:

₂— Ich taure ti layt wayl ti sin xon tray taache too pay mich un hon niks fer se ese. ₃Wën ich se hëm xike mit hunger, tuun se iwer weech um fale fon xwachheet, wayl phaar sin fon waytem khom.

₄Ti tisiple hon kefroot:

— Woo, uf tëm tesërt plats, sole meyer ese fine woo kenuuch is fer soo fiil mënxe?

₅Yeesus hot kefroot:

— Wii fiil proot het teyer?

Tii hon keantwort:

— Siwe.

₆Tan hot Yeesus kexikt tas folek solt sich uf te pootem setse. Tëm noo, hot eyer ti siwe proot kehool un hot Hërkot ketankt. Tan, hot eyer se keteelt un hot se fer ti tisiple ap kep, un tii hon se aus keteelt fer tas folek. ₇Ti hate aach phaar fixyer. Yeesus hot Hërkot ketankt fer ti fix un hot kexikt tas ti tisiple se aus teele solte. ₈Ti kanse layt hon kes un sin tsufriite kep; un ti tisiple hon noch siwe khërep kefilt mit te xtiker woo iwerich keplip sin. ₉Ti layt woo kes hon waare unkefeyer fier tausent mënxe.

Yeesus hot tas folek fort kexikt, ₁₀un, klaych tëm noo, is eyer uf en poot kextii mit sayn tisiple, un is noo te rechioon Dalmanuta kang.

₁₁Phaar fariseyer sin aan khom un hon aankefang mit Yeesus se xpreche. Ti wolte en proop keeche iim aan richte un tesweche hon se ferlangt eyer solt en wuner mache fer se tsayche tas sayn macht wërklich fon Hërkot kheemt. ₁₂Yeesus hot tiif luft ketsoo un saat:

— Warom ferlange ti layt fon hayt tsuu taach en wuner? Ich fersichere aych tas tas woer is: khee eene wuner kept kemach fer tii layt.

₁₃Tan is Yeesus fort kang. Eyer is uf en poot kextii un is tsurik uf ti aner sayt fon te lakoo kereest.

₁₄Ti tisiple hate ferkes proot mit nëme un hate ploos een proot im poot. ₁₅Yeesus hot tëne ti acht aan keruuf, am saan:

— Playpt in acht un past uf mit em heep fon te fariseyer un mit em heep fon Herootes!

₁₆Too hon ti tisiple aankefang se saan ëne fer te anere:

— Tee saat tas wayl meyer khee proot mee hon.

₁₇Yeesus hot keheyert was ti am saan waare un hot kefroot:

— Warom sayt teyer am tisputeere wayl teyer khee proot mee hot? Weest teyer net un fertxteet teyer net was ich kesaat hon? Warom sayt teyer soo hart fer etwas se ferxteen? ₁₈Het teyer aue woo net siin? Teyer het oore un heyert net? Tënkt teyer net traan ₁₉an tëne finef proot woo ich keteelt hon fer finef tausent mënxe? Wii fiil khërep het teyer kesamelt?

Tii hon keantwort:

— Tswelef.

₂₀Yeesus hot noch mool kefroot:

— Un, wën ich ti siwe proot keteelt hon fer fier tausent mënxe, wii fiil khërep fol xtiker het teyer kesamelt?

Tii hon keantwort:

— Siwe.

₂₁Tan, hot Yeesus kefroot:

— Meecht teyer imer noch net ferxteen?

₂₂Tëm noo sin Yeesus un ti tisiple pis an tas plats Petsayta hiin khom. Phaar layt hon en plinte keprung un hon ferlangt tas Yeesus an iim faare solt. ₂₃Eyer hot te plinte an ti hant kehool un hot em aus te wile kenom. Tan hot eyer kexpukt, hot te xpuk an tëm man sayn aue kexmeyert, hot tëm ti hant iwer kehal un hot kefroot:

— Pist tuu etwas am siin?

₂₄Te man hot kekukt un saat:

— Ich siin layt; ti siin aus wii peem, awer sin am keen.

₂₅Yeesus hot noch mool ti hënt uf tëm sayn aue ketuun. Tas mool hot te plinte xtram kekukt un is kuriert kep; tan hot eyer aankefang ales richtich se siin. ₂₆Klaych tëm noo, hot Yeesus te man hëm kexikt un hot tii ortnung kep:

— Kee net tsurik in ti wile!

₂₇Tëm noo is Yeesus mit sayn tisiple kang noo te wile woo ticht an Sesarëya fon Filipe playwe. Uf em weech, hot Eyer tëne kefroot:

— Weyer saat tas folek tas ich weyer?

₂₈Ti tisiple hon keantwort:

— Phaar saan tas tuu Yohan Te Taafer sayt; anere, tas Teyer Eliias sayt; un noch anere, tas Teyer ëne fon te Profëte sayt.

₂₉Yeesus hot kefroot:

— Un teyer? Weyer saat teyer tas Ich sin?

Pheeter hot keantwort:

— Teyer sayt te Kristus!

₃₀Tan hot Yeesus ti tisiple ferpot etwas too triwer saan fer yemant.

₃₁Yeesus hot aankefang ti tisiple se unterichte, am saan:

— Te Soon fom Man mus fiil layte mit mache. Ti yute fiirer, ti xëfe fon te priister un ti Kesets mayster tuun iim ap xtoose. Kept toot kemach un, tray taache tëm noo, tuut Eyer peleewe.

₃₂Yeesus hot tas kans klaar kesaat. Tan hot Pheeter Tee uf sayt kenom un hot aankefang Yeesus se xteere. ₃₃Yeesus hot sich rom kewënt, hot ti tisiple aan kekuk un hot Pheeter kexteyert, am saan:

— Kee foer mich wech, Satanaas! Tuu pist am tënke wii en mënx tënkt un net wii Hërkot tënkt.

₃₄Tan hot Yeesus tas folek un ti tisiple pay keruuf un saat:

— Wën yemant mayne aanhënger sin wil, mus eyer sayn aychne interese ferkese, mus fërtich sin fer se xtërwe wii ich xtërwe tuun un mit mich khome. ₃₅Wayl weyer sayn aychne interese foer tsiit wërt nii es echte leewe hon; awer weyer sich selepst ferkest weche mich un weche em ewankeelium wërt es echte leewe hon. ₃₆Was nutst yemant ti kans welt fertiine, awer tas echte leewe ferleere? ₃₇Wayl es kept niks woo eyer petsaale khan fer tas leewe tsurik kriin. ₃₈Also, wën in tëne tsayte fon unklauplichkheet un xlechtichkheete yemant sich xeeme tuut fon mich un mayn unterichte, tan wërt te Soon fom Man, wan Eyer im Fater sayn kloor mit te hayliche ëngle khome tuut, aach sich xeeme fon tëm.